དུང་དཀར་བློ་བཟང་འཕྲིན་ལས་ཀྱི་བསམ་གཞིག་གསར་བའི་ལོ་རྒྱུས་ལྟ་ཚུལ་དཔྱོད་གླེང་།

 

109834343434 འབྲོང་བུ་ཚེ་རིང་རྡོ་རྗེས་བརྩམས།
དབང་དྲག་རྡོ་རྗེས་བསྒྱུར།

གཅིག

བོད་ཞི་བས་བཅིངས་འགྲོལ་བཏང་ཚུན་གྱི་ལོ་ངོ་དྲུག་ཅུ་ལྷག་ཙམ་རིང་གི་འཕེལ་རྒྱས་དང་བསམ་གཞིག་གི་འཕེལ་འགྱུར་ལ་བརྟག་སྐབས། མདོ་དབུས་མཐོ་སྒང་དུ་འཚོ་བའི་སྐྱེ་བོ་རྣམས་ཀྱིས་བག་ལ་ཞ་བའི་ཚུལ་གྱིས་ཚན་རྩལ་རིག་གནས་ཀྱི་ཉིང་བཅུད་དུ་གྱུར་བའི་བསམ་བློ་དང་ཚན་རྩལ་གྱི་འབྲས་བུ་རྒྱུན་འཛིན་བྱེད་ཀྱི་ཡོད་པ་དང་། ཐ་ན་ཚན་རིག་ལག་རྩལ་གྱི་ཐབས་ལ་བརྟེན་ནས་འགྲོ་འདུག་སྤྱོད་གསུམ་ལ་སོགས་པས་མཚོན་པའི་དངོས་ཡོད་གནས་ཚུལ་ལ་བསྒྱུར་བཅོས་གཏོང་གི་ཡོད། ཡིན་ནའང་། ནང་སེམས་ཀྱི་དུངས་ཞེན་གྱི་ངོས་ནས་འཕེལ་འགྱུར་འདི་དག་ཚན་རྩལ་གྱི་སྟོབས་ལས་བྱུང་བར་ཁས་ལེན་མི་འདོད་ལ། ཁས་བླངས་ཚེ་སྲོལ་རྒྱུན་རིག་གནས་དང་ཁ་གཏད་དུ་ལངས་པར་ཡང་བསམ་གྱི་ཡོད་པ་རེད། དེ་བས། ང་ཚོས་སྲོལ་རྒྱུན་རིག་གནས་ཀྱིས་དངོས་ཡོད་སྤྱི་ཚོགས་ནང་གོ་གནས་དང་ནུས་པ་གང་འདྲ་ཞིག་བཟུང་བར་བསམ་ཞིབ་བྱེད་སྐབས། མི་འགའ་རེས་ཁོ་བོར་ “སྲོལ་རྒྱུན་རིག་གནས་ལ་སྐྱོན་ཆ་ག་རེ་ཡོད་དམ། སྲོལ་རྒྱུན་རིག་གནས་ལ་ཉེས་པ་ག་རེ་ཡོད་དམ། ” ཞེས་འདྲི་བར་བྱེད་ཀྱང་། ཁོ་བོས་ཕྱོགས་ཡོངས་སུ་དོན་དངོས་དང་མཐུན་པའི་སྒོ་ནས་སྲོལ་རྒྱུན་རིག་གནས་ལ་གདེང་འཇོག་བྱེད་པ་ལས། མཐའ་གཅིག་ཏུ་དགག་མི་རུང་ལ། མཐའ་གཅིག་ཏུ་རྒྱུན་འཛིན་བྱེད་པ་ཞིག་མིན་ཞེས་ལན་བསྐྱོན་པ་ཡིན། རྒྱུ་མཚན་ནི། རིག་གནས་ཡོན་ཏན་དང་བསམ་བློའི་གོ་རྟོགས་མཐོན་པོ་ཡོད་པ། རིགས་པའི་མཐའ་དཔྱོད་པ་ལ་འཇུག་པར་སྤྲོ་བའི་སྐྱེ་བོ་སུ་དང་སུ་ཡིན་རུང་། སྲོལ་རྒྱུན་རིག་གནས་མེད་ན། མིའི་རིགས་ཀྱི་ད་ལྟའི་འཕེལ་རྒྱས་འདི་ཡོད་མི་སྲིད་པ་དང་། ད་ ལྟའི་ཤེར་རྟོགས་རིག་པའི་བསམ་བློ་ཕུན་སུམ་ཚོགས་པོ་འདི་དང་ཚན་རྩལ་གྱི་འབྲས་བུ་འདི་དེ་བས་ཀྱང་འབྱུང་ཐབས་མེད་པ་གསལ་པོར་རྟོགས་ངེས་པས་རེད། འོ་ན། གནད་དོན་འདིའི་འབྱུང་རྐྱེན་གང་ལ་ཐུག་ཅེ་ན། ཁོ་བོས་བསམ་ན། ང་ཚོས་ནམ་ཡང་ལོ་རྒྱུས་དང་དངོས་ཡོད་གནས་ཚུལ། སྲོལ་རྒྱུན་རིག་གནས་དང་ཚན་རྩལ་རིག་གནས་དབར་གྱི་རྩོད་སྒྲུབ་ཀྱི་འབྲེལ་བ་དེ་ལ་བསམ་ ཞིབ་མི་བྱེད་པ་དང་། ལྷག་པར་དུ་ལོ་རྒྱུས་དང་སྲོལ་རྒྱུན་ནི་འདས་ཟིན་པའི་མིའི་རིགས་ཀྱི་ཤེས་རིག་ཅིག་ཡིན་པ་ལས། ད་ལྟ་དང་འབྱུང་ འགྱུར་གྱི་མིའི་རིགས་ཀྱི་ཤེས་རིག་ཅིག་གཏན་ནས་མ་ཡིན་པའི་གནད་ཀ་དེར་རིགས་པའི་ རྩོད་སྒྲུབ་ཀྱིས་རྟོག་དཔྱོད་མི་བྱེད་པ་དེ་རེད།   ང་ཚོའི་བྱེད་སྟངས་ཀྱི་ཕྱོགས་ཐམས་ཅད་ལས་ལོ་རྒྱུས་ཀྱི་ཆེད་དུ་འཚོ་ཞིང་གཞེས་པ་དང་། ལོ་རྒྱུས་ཀྱི་ཆེད་དུ་དགའ་ཞིང་མགུ་པ། ལོ་རྒྱུས་ཀྱི་ཆེད་དུ་མི་ཚེ་བསྐྱལ་བའི་སྣང་ཚུལ་ཞིག་མངོན་གྱི་ཡོད་པ་དང་།   དེ་ལྟར་བློ་བག་ལ་ཞ་བའི་ཚུལ་དུ་འདས་སོང་གི་ལོ་རྒྱུས་ཀྱིས་འུ་ཅག་གི་ད་ལྟའི་འཚོ་བ་དང་མ་འོངས་པར་འཇུག་པའི་ཤེས་རབ་ཀྱི་ཚབ་བྱས་ཡོད་ལ། མིའི་རིགས་ཀྱི་སྐྱེ་བོའི་རིན་ཐང་གི་ངོས་ནས་བཤད་ན། དུས་རབས་ཀྱི་འཕེལ་རྒྱས་ལ་འགན་འཁུར་བ་དང་། དུས་རབས་ཀྱི་ཆེད་དུ་ནུས་ཤུགས་ཡོད་རྒུ་འདོན་པ་ནི་མི་ཞིག་གི་ཆེས་རྩ་བའི་འགན་འཁྲི་ཡིན་པས། འདི་ནི་ལྡེམ་འགྱུར་གྱི་ཤེས་རབ་ཡིན་ལ། བསམ་གཞིག་གསར་པའི་ལོ་རྒྱུས་ལྟ་ཚུལ་ཀྱང་ཡིན། ལོ་རྒྱུས་ཞིབ་འཇུག་དང་དུས་རབས་ཀྱི་འཕེལ་རྒྱས་ལ་ཤེས་རབ་གསར་བ་དང་སྟོབས་ཤུགས་གསར་བ་སྦྱིན་པའི་སྒུལ་ཤུགས་ཀྱང་ངོ་། ། དེའི་ཕྱིར་ན། འདིར་ཁོ་བོས་ལོ་རྒྱུས་རིག་པའི་མཁས་དབང་དུང་དཀར་བློ་བཟང་འཕྲིན་ལས་ཀྱི་བསམ་ གཞིག་གསར་བའི་ལོ་རྒྱུས་ལྟ་ཚུལ་གཞིར་བཟུང་སྟེ་གོང་གི་གནད་དོན་དེ་ལ་ལན་གདབ་ རྒྱུ་ཡིན།

གཉིས།

དུང་དཀར་བློ་བཟང་འཕྲིན་ལས་ནི་དེང་རབས་བོད་ཀྱི་ མཁས་པའི་ཁྲོད་ན་སྐད་གྲགས་ཤིན་ཏུ་ཆེ་བ་ཞིག་ཡིན་པ་དང་། ཁོང་གིས་མར་ཁེ་སི་དངོས་གཙོ་རིང་ལུགས་ཀྱི་ལོ་རྒྱུས་ལྟ་ཚུལ་ཉིད་བོད་ཀྱི་ལོ་ རྒྱུས་ལ་ཞིབ་འཇུག་བྱེད་པའི་བསམ་བློའི་མཛུབ་སྟོན་དུ་བཟུང་སྟེ་བོད་ཀྱི་ལོ་ རྒྱུས་ལ་ཞིབ་འཇུག་བྱས་པར་བརྟེན། བོད་ཀྱི་ཆོས་སྲིད་ཟུང་འབྲེལ་ལམ་ལུགས་ཀྱི་རུལ་སུངས་ཀྱི་ཚུལ་དེ་མངོན་པར་ཕྱུང་ བའི་ལོ་རྒྱུས་སྨྲ་བ་སྐད་གྲགས་ཅན་ཞིག་ཏུ་གྱུར་བ་དང་། བོད་ཀྱི་ལོ་རྒྱུས་ཞིབ་འཇུག་དང་སྤྱི་ཚོགས་རིང་ལུགས་ཀྱི་རིག་གནས་བྱ་གཞག་དར་སྤེལ་གྱི་ཕྱོགས་ལ་མཛད་རྗེས་བླ་ན་མེད་པ་ཞིག་བཞག་ཡོད། ཁོང་གི་མི་ཚེ་གང་བོ་ནི་རིག་གཞུང་ཞིབ་འཇུག་གི་འོད་སྟོང་གསར་དུ་འཚེར་བའི་མི་ཚེ་ཞིག་ཡིན་ལ། རིག་གཞུང་ཁྱབ་ཁོངས་སོ་སོ་ན་ཞིབ་འཇུག་གི་འབྲས་བུ་གཡུར་དུ་ཟ་ཞིང་། གསར་གཏོད་ཀྱི་ལམ་བུ་བཏོད་པའི་ཕྱག་རྗེས་གང་མང་བཞག་ཡོད་དེ། དཔེར་ན། བོད་ཀྱི་ཆོས་ལུགས་ཟུང་འབྲེལ་གྱི་ལམ་ལུགས་སྐོར་ལ་ཞིབ་འཇུག་གནང་བ་དང་། བོད་ཀྱི་དཀར་ཆག་རིག་པར་ཞིབ་འཇུག་བྱེད་པ།   བོད་ཀྱི་སློབ་གསོ་རིག་པའི་ཐད་ཞིབ་འཇུག་གནང་བ་ལྟ་བུའོ། །དེ་ལས་<<བོད་ཀྱི་ཆོས་སྲིད་ཟུང་འབྲེལ་སྐོར་བཤད་པ་>>ཞེས་པའི་བསྟན་བཅོས་གྲགས་ཅན་དེའི་ཞིབ་འཇུག་གི་ཐབས་ལམ་དང་བསམ་གཞིག་གི་རིགས་ལམ་དེ་ནི། ལོ་ཚིགས་གུང་བསྒྲིགས་པ་ཙམ་དང་ལོ་རྒྱུས་དོན་རྐྱེན་གྱི་བྱུང་རིམ་གཙོ་བོར་སྟོན་པའི་ལོ་རྒྱུས་ཞིབ་འཇུག་ཙམ་ལས་འདས་ཏེ།   མཐའ་དཔྱོད་དང་དགག་སྒྲུབ་ཀྱི་འཇུག་པ་ཡངས་པའི་ལོ་རྒྱུས་ཤེར་རྟོགས་རིག་པའི་ཁྱབ་ ཁོངས་སུ་སླེབས་ཡོད། ཁོང་གིས་ཆོས་སྲིད་ཟུང་འབྲེལ་ལམ་ལུགས་ལས་བྱུང་བའི་སྐྱོ་གར་ལ་ཞིབ་འཇུག་བྱེད་ པའི་ཚེ། བོད་མི་རང་ཉིད་བརྒྱུད་མྱོང་བ་དང་རང་ཉིད་ཀྱིས་བྱས་བྱས་ཐམས་ཅད་ལ་ཞིབ་འཇུག་ བྱེད་པ་མ་ཡིན་པར། རང་ཉིད་བོད་མི་ ཞིག་ཡིན་པའི་ངོས་ནས་རང་ཉིད་ཀྱི་འདས་སོང་གི་ཆོས་སྲིད་ཟུང་འབྲེལ་གྱི་ལམ་ལུགས་ལ་བསམ་ཞིབ་དང་དཔྱོད་གླེང་བྱེད་རྒྱུ་ཞིབ་འཇུག་གི་གནད་གཙོ་བོར་བཟུང་ཡོད་པ་དང་། གནད་དོན་ཅན་གྱི་ལོ་རྒྱུས་ལམ་ལུགས་ཀྱིས་བོད་ཀྱི་སྤྱི་ཚོགས་འཕེལ་རྒྱས་ལ་འགོག་རྐྱེན་ཐེབས་ཚུལ་ཐོག་མཐའ་བར་གསུམ་དུ་མངོན་པར་བསྟན་ཡོད། སློབ་དཔོན་ཆེན་མོ་དུང་དཀར་ལགས་ཀྱི་སྐད་གྲགས་ཆེ་བའི་བསྟན་བཅོས་གཞན་ཞིག་ནི་<<བོད་ཀྱི་དཀར་ཆག་རིག་པ>>ཞེས་པ་དེ་ཡིན། བསྟན་བཅོས་དེས་བོད་ཀྱི་དེང་རབས་དཀར་ཆག་རིག་པའི་སྟོང་ཆ་བསྐངས་ཡོད་པ་མ་ཟད། གཞུང་ལུགས་ཀྱི་མ་ལག་ཚང་ཞིང་ཅུང་ཆ་ཚང་བའི་བོད་ཡིག་གི་དཀར་ཆག་རིག་པ་ཞིག་ཡིན་ལ། གསར་གཏོད་རང་བཞིན་དང་སྟོང་ཆ་ཁ་གསབ་རང་བཞིན་ལྡན་པའི་བསམ་གཞིག་གསར་པའི་ཁྱད་རྩོམ་ཞིག་ཡིན།

དུང་དཀར་བློ་བཟང་འཕྲིན་ལས་ལགས་ཀྱིས་འུ་ཅག་ཕྱི་རབས་པ་རྣམས་ལ་རིག་གཞུང་གི་ལེགས་སྐྱེས་ཕུན་སུམ་ཚོགས་པོ་ཞིག་བཞག་ཡོད་ཀྱང་། ད་ལྟའི་དུས་ཀྱི་ལོ་རྒྱུས་སྨྲ་བའི་སྡེ་དང་སློབ་གསོ་སྨྲ་བའི་སྡེ། ཡང་ན་རིག་ཚན་འདི་དག་ལ་ཆེད་དུ་ཞིབ་འཇུག་བྱེད་མཁན་གྱི་སྡེ་གང་ཡིན་རུང་། རྩོམ་ཡིག་རེ་འབྲི་བའི་ཚེ་སློབ་དཔོན་ཆེན་མོ་དུང་དཀར་ལགས་ཀྱི་ཞིབ་འཇུག་གི་འབྲས་བུ་དཔྱད་ཡིག་གི་ཚུལ་དུ་ལུང་རེ་འདྲེན་པ་མ་གཏོགས། སློབ་དཔོན་ཆེན་མོ་དུང་དཀར་ལགས་ཀྱི་རིག་གཞུང་བསམ་བློ་ལ་ཆེད་དུ་ཞིབ་འཇུག་བྱེད་མཁན་ནམ་མཁའི་པདྨོའི་ཟླར་གྱུར་འདུག་པས། འདི་ནི་འུ་ཅག་ཕྱི་རབས་པ་རྣམས་ངོ་གནོང་དགོས་པའི་བྱ་བ་ཞིག་མ་ཡིན་ནམ།

སྔར་བྱུང་བའི་གནད་དོན་ཅན་གྱི་ལོ་རྒྱུས་དང་གནད་དོན་ཅན་གྱི་ལམ་ལུགས་དེས་ངེད་ཅག་གི་སེམས་པར་གསོ་དཀའ་བའི་རྨ་ཁ་བཟོས་པ་དང་། ངེད་ཅག་འཚོ་བའི་དུས་རབས་འདིའི་འཕེལ་རྒྱས་ལ་འགོག་རྐྱེན་དང་།   ངེད་ཅག་མདུན་དུ་སྐྱོད་པའི་ལམ་ཁར་བཀག་སྡོམ་རབ་དང་རིམ་པ་བཟོས་ཏེ། མཐར་ངེད་ཅག་གིས་མིའི་རིགས་ཀྱི་ཤེས་རིག་གི་ཉིང་བཅུད་བསྡུ་ལེན་བྱ་རྒྱུར་འགོག་རྐྱེན་ཚད་མེད་བཟོས་ཡོད་པས།   སློབ་དཔོན་ཆེན་མོ་དུང་དཀར་མཆོག་གིས་ལོ་རྒྱུས་ཐོག་གནད་དོན་ཅན་གྱི་ལམ་ལུགས་དེས་བཟོས་པའི་རྨ་ཁ་གསོ་ཆེད་ “ཆོས་སྲིད་ཟུང་འབྲེལ་ལམ་ལུགས་”ལས་བྱུང་བའི་ལོ་རྒྱུས་ཀྱི་སྐྱོ་གར་དེ་ལ་ཐུགས་ ནུས་ཡོད་ཚད་ཀྱིས་རྒྱུས་ལོན་དང་། ཕྱོགས་སོ་སོ་ནས་ཞིབ་འཇུག་གནང་སྟེ་མཐོ་སྒང་པ་ཚོས་གནད་དོན་ཅན་གྱི་ལམ་ལུགས་ དེར་གོང་བཀུར་དང་ཇི་ཙམ་ཞུགས་དྲགས་པ་ལས་ཕྱིས་ཀྱི་ལོ་རྒྱུས་འཕེལ་རྒྱས་ལ་གསབ་ དཀའ་བའི་གྱོང་ཀུན་བཟོས་ཡོད་པའི་སྣང་ཚུལ་ལ་གསེད་འགྲོལ་གང་ལེགས་མཛད་ཡོད། ང་ ཚོ་ད་དུང་འདི་ལྟར་གཉིད་དུ་ཡུར་རྒྱུ་ཡིན་ནམ། ང་ཚོས་མུ་མཐུད་སྣང་ལ་མ་ངེས་པའི་གཏན་ཚིགས་ཀྱི་བསམ་བློ་རྒྱུན་འཛིན་བྱེད་རྒྱུ་ ཡིན་ནམ། ཡང་ན། ཁོང་གི་རླབས་ཆེ་བའི་མཛད་རྗེས་འདི་དང་ལེན་བྱེད་མི་འདོད་པ་ཨེ་ཡིན། གནད་དོན་འདིའི་སྐོར་ལ་ཁོ་བོས་<<རིག་གཞུང་སྨྲ་བའི་རྣམ་དཔྱོད། དངོས་སྟོབས་རིག་པའི་ཤེས་རབ།>>(༢༠༡༤ལོའི་ཟླ་༣ཚེས་༡༨ཉིན་གྱི་བོད་ལྗོངས་ཉིན་རེའི་ཚགས་པར་ལ་གཟིགས།)ཅེས་པའི་རྩོམ་ཡིག་དེར་དཔྱད་གླེང་བྱས་ཡོད།

དུང་དཀར་བློ་བཟང་འཕྲིན་ལས་མཆོག་སློབ་དཔོན་ཆེན་མོ་ཞིག་ཡིན་པའི་ངོས་ནས། སློབ་མ་འགའ་རེ་བསྐྱངས་གནང་པ་དང་། རང་ཉིད་ཀྱི་དཔྱོད་ཤེས་མ་ཞུགས་པའི་གཞུང་ལུགས་དེ་བློ་འཛིན་དང་གསུང་རྒྱུན་ཇི་བཞིན་གཞན་ལ་ངོ་སྤྲོད་པ་ཙམ་གཏན་ནས་མ་ཡིན་པར།   མཐའ་དཔྱོད་ལ་འཇུག་པའི་རིགས་པ་དང་དགག་སྒྲུབ་ཀྱི་རིགས་ཤེས། བསམ་ གཞིག་གསར་པའི་ལོ་རྒྱུས་ལྟ་ཚུལ་གྱི་ལམ་ནས་རང་ཉིད་ཀྱི་ངེས་ཤིང་འདྲོངས་པའི་ བསམ་བློའི་ཉིང་བཅུད་དེ་སློབ་བུ་རིགས་པ་སྨྲ་བ་རྣམས་ལ་གནང་པ་དེ་ཡིན། དེ་ ལྟའི་སློབ་སྟོན་གྱིས་རིག་གནས་ཤེས་བྱའི་ཉིང་ཁུ་བརྒྱུད་སྤྲོད་ཐུབ་པ་མ་ཟད། བསམ་གཞིག་གསར་པའི་ལོ་རྒྱུས་ལྟ་ཚུལ་ཀྱང་ཀུན་ལ་གནང་ཐུབ་པ་བྱུང་ཡོད།

གསུམ།

དུང་དཀར་བློ་བཟང་འཕྲིན་ལས་མཆོག་ནི་མར་ཁེ་སི་རིང་ལུགས་ཀྱི་དགོངས་པར་སློབ་སྦྱོང་བྱེད་པ་དང་དེ་དངོས་སུ་བེད་སྤྱོད་གནང་ཐུབ་མཁན་ཞིག་དང་། མར་ ཁེ་སི་དངོས་གཙོ་རིང་ལུགས་ཀྱི་ལོ་རྒྱུས་ལྟ་ཚུལ་གྱི་མཛུབ་སྟོན་འོག་བོད་ཀྱི་ ལོ་རྒྱུས་རིག་གནས་ལ་ཞིབ་འཇུག་བྱེད་མཁན་གྱི་དུས་རབས་འདིའི་ལོ་རྒྱུས་སྨྲ་བའི་ དེད་དཔོན་ལྟ་བུ་ཞིག་ཡིན། ཁོང་གི་ ལོ་རྒྱུས་ཞིབ་འཇུག་གི་བསམ་གཞིག་དེ་ནི་ལྷ་སྒྲུང་གི་སྒྲོག་གིས་བཅིངས་པའི་ སྲོལ་རྒྱུན་ལོ་རྒྱུས་རིག་པའི་ལྟ་ཚུལ་ལས་རབ་ཏུ་བརྒལ་ཅིང་། རྩ་བའི་ཆ་ནས་སྲོལ་རྒྱུན་ལོ་རྒྱུས་རིག་པའི་བསམ་བློའི་མཛུབ་སྟོན་དང་ཞིབ་འཇུག་ཐབས་ལམ་ཞལ་ཀྱིས་མི་བཞེས་པར། རིགས་ཤེས་དང་ཚན་རིག་ཟུང་དུ་སྦྲེལ་བའི་བསམ་གཞིག་གསར་བའི་ལོ་རྒྱུས་ལྟ་ཚུལ་དར་སྤེལ་གནང་ཡོད། ཕྱོགས་གཞན་ཞིག་གི་ཆ་ནས་བཤད་ན། བོད་ ཀྱི་སྲོལ་རྒྱུན་ལོ་རྒྱུས་རིག་པའི་ཞིབ་འཇུག་བྱེད་ཐབས་ཉིད་མཇུག་སྒྲིལ་པ་དང་ བསམ་གཞིག་གསར་པའི་རིགས་ལམ་འོག་ལོ་རྒྱུས་ཤེར་རྟོགས་རིག་པར་ཞིབ་འཇུག་བྱེད་ པའི་སྒོ་གླེགས་ཕྱེ་ཟིན་པ་ནི། སློབ་དཔོན་ཆེན་མོ་དུང་དཀར་མཆོག་གི་<<བོད་ཀྱི་ཆོས་སྲིད་ཟུང་འབྲེལ་གྱི་ལམ་ལུགས་སྐོར་བཤད་པ་>>ཞེས་པའི་བསྟན་བཅོས་དེའི་སྟེང་ནས་གསལ་བོར་མཚོན་ཐུབ།   དེ་ཡང་ཡིན་ཏེ། ལོ་ རྒྱུས་ལ་ཞིབ་འཇུག་བྱས་པ་དེས་མི་རྣམས་ལ་མྱོང་བ་དང་ཤེས་བྱ་མཁོ་སྤྲོད་གནང་བ་ ཙམ་མ་ཟད། ཆེས་གལ་ཆེ་བ་ནི་མི་ལ་རྩོད་སྒྲུབ་ཀྱི་བསམ་གཞིག་ཅིག་མཁོ་སྤྲོད་བྱེད་པ་དང་། མི་རྣམས་ལ་ལོ་རྒྱུས་ཀྱི་གོ་རྟོགས་ཟབ་མོ་ཞིག་དང་མིག་རྒྱང་རིང་མོ་ཞིག་གིས་འདས་སོང་གི་དུས་རབས་ལ་བལྟ་བ་དང་། ད་ལྟ་ཉིད་བདེན་པར་འཚོལ་ཞིང་། མ་ འོངས་པར་སྔོན་དཔག་བྱེད་དགོས་ཚུལ་བསྟན་ཡོད་པ་དེ་རེད། ང་ཚོས་ལོ་རྒྱུས་ཀྱི་སྐྱོ་གར་དང་གནད་དོན་ཅན་གྱི་ལོ་རྒྱུས་ཀྱི་ངོ་བོ་ལེགས་པར་ ངོས་ཟིན་ཚེ། ད་གཟོད་གཞི་ནས་དངོས་ཡོད་སྤྱི་ཚོགས་ཀྱི་འཚོ་གནས་གནད་དོན་ཉིད་ཐག་གཅོད་བྱེད་ཐུབ་པ་དང་། ལོ་རྒྱུས་ཀྱི་ཆོས་ཉིད་དང་མཐུན་པའི་འཕེལ་རྒྱས་ཀྱི་མདུན་ལམ་ཞིག་ཡང་དག་པའི་སྒོ་ནས་འཚོལ་རྟོག་དང་གདམ་གསེས་བྱེད་ཐུབ།

མདོར་ན། ཀྲུང་གོ་གསར་བ་དབུ་བརྙེས་ཏེ་བོད་ཞི་བས་བཅིངས་འགྲོལ་བཏང་བ་ནས་བཟུང་། བོད་ཀྱི་སྤྱི་ཚོགས་འདི་ཉིད་ཤེས་རིག་ལྡན་པ། སེམས་ཤུགས་ཆེ་བ། འཕེལ་རྒྱས་དང་བསྒྱུར་བཅོས་ཀྱི་ཚ་རླབས་དགུང་དུ་འཕྱུར་བའི་དུས་སྐབས་ཤིག་ཏུ་སླེབས་པ་དང་། བོད་ཀྱི་སྤྱི་ཚོགས་ཉིད་སྲོལ་རྒྱུན་ཅན་གྱི་སྤྱི་ཚོགས་ནས་ཚན་རྩལ་གྱི་ཤེས་རིག་ལ་སྙེག་པའི་དུས་རབས་སུ་འཕོ་འགྱུར་བྱུང་བའི་དུས་སྐབས་ཤིག མཐོ་སྒང་གི་ཤེས་རིག་ཉིད་དེང་རབས་ཚན་རྩལ་རིག་གནས་ཀྱི་གདོང་ཐུག་འོག་འཕེལ་འགྱུར་འབྱུང་བཞིན་པའི་ཐོབ་རྒལ་གྱི་དུས་སྐབས་ཤིག་ཀྱང་ཡིན། སློབ་དཔོན་ཆེན་མོ་དུང་དཀར་མཆོག་ནི་སྤྱི་ཚོགས་གསར་རྙིང་གི་ལམ་ལུགས་གཉིས་ཀར་རྒྱུས་ཡོད་པ་དང་། མི་རིགས་ཤིག་གི་ལས་དབང་དང་འཕེལ་རྒྱས་ཀྱི་མདུན་ལམ་ལ་སྒྱུར་བཅོས་གཏོང་དགོས་ན། ངེས་པར་དུ་ཤེར་རྟོགས་རིག་པའི་བསམ་གཞིག་ཅིག་དང་ལོ་རྒྱུས་ཀྱི་བསམ་གཞིག་ཅིག་ལ་བརྟེན་དགོས་པ་གསལ་པོར་རྟོགས་ཡོད་པ་རེད། ཁོང་ གིས་སྔོན་བྱུང་གི་ངོ་མཚར་བའི་ལོ་རྒྱུས་ཉིད་ང་ཚོ་དེང་རབས་ཀྱི་སྐྱེ་བོ་རྣམས་ སྤོབས་པ་སྐྱེད་བྱེད་ཀྱི་མ་རྩ་གཏན་ནས་མ་ཡིན་པ་གསལ་རྟོགས་བྱུང་ཡོད་པ་དང་། རང་ཉིད་ལོ་རྒྱུས་རིག་གནས་ལ་ཞིབ་འཇུག་བྱེད་མཁན་ཞིག་ཡིན་པའི་ཆ་ནས། མར་ཁེ་སིའི་དངོས་གཙོ་རིང་ལུགས་ཀྱི་ལོ་རྒྱུས་ལྟ་བར་སློབ་སྦྱོང་དང་། ལོ་རྒྱུས་དངོས་གཙོ་རིང་ལུགས་ཀྱི་ལྟ་བ་ལ་བརྟེན་ནས་བོད་ཀྱི་ལོ་རྒྱུས་ལ་ཞིབ་འཇུག   རིག་གནས་བསམ་གཞིག་གི་ལྟ་ཚུལ་གསར་བ་ཞིག་གི་སྒོ་ཕྱེ་སྟེ། བོད་ཀྱི་སྤྱི་ཚོགས་འཕེལ་རྒྱས་སུ་འགྲོ་བའི་མདུན་ལམ་ཞིག་འཚོལ་སྙེག་བྱེད་པ་ནི་ཁོང་ཉིད་སྤོབས་པ་སྐྱེད་བྱེད་ཀྱི་མ་རྩ་རུ་གྱུར་ཡོད། སློབ་དཔོན་ཆེན་མོ་དུང་དཀར་མཆོག་གི་ལོ་རྒྱུས་ལྟ་ཚུལ་དེ་ཉིད་དོན་དངོས་ལ་ཉེ་བར་རེག་ཅིང་ཕྱི་རོལ་ཡུལ་གྱི་ཆོས་ཉིད་དང་མཐུན་པས། མཐོ་སྒང་ན་འཚོ་ཞིང་བཞེས་པའི་སྐྱེ་བོ་རྣམས་ཀྱི་རྒྱུན་སྲོལ་གྱི་ཤེས་རིག་དང་། རིག་གནས་བསམ་གཞིག སྤྱི་ཚོགས་སྲོལ་ལུགས་སྒྱུར་བཅོས་གཏོང་བའི་ཕྱོགས་ལ་སྟོབས་ཤུགས་ཆེན་པོ་ཞིག་གནང་ཡོད། དེའི་ རྒྱུ་མཚན་གྱིས། ཁོ་བོས་བསམ་ན་སློབ་དཔོན་ཆེན་མོ་དུང་དཀར་མཆོག་གིས་སྲོལ་ཕྱེ་བའི་བསམ་གཞིག་ གསར་པའི་ལོ་རྒྱུས་ལྟ་ཚུལ་དང་ཕྱི་དོན་རྣམ་བདེན་རིང་ལུགས་ཀྱི་ཞིབ་འཇུག་བྱེད་ ཐབས་སམ་ཚན་རིག་དང་མཐུན་པའི་ཕྱི་དོན་ཞིབ་འཇུག་གི་ཐབས་ལམ་ཀྱིས། ང་ཚོ་ཕྱི་རབས་པའི་ལོ་རྒྱུས་ཞིབ་འཇུག་པ་རྣམས་ལ་ལོ་རྒྱུས་ནི་མིའི་རིགས་ཀྱི་སྤྱི་ཚོགས་སྔོན་དུ་བསྐྱོད་རྒྱུ་མ་ཟད། ཕྱི་རོལ་ཆོས་ཉིད་དང་མཐུན་ཞིང་མི་རང་ཉིད་ཀྱིས་བསྐྲུན་པའི་ལོ་རྒྱུས་ལྟ་ཚུལ་ཞིག་ཡིན་པར་རྐང་ཚུགས་ཡོད་པས།   བོད་ཀྱི་ལོ་རྒྱུས་ལྷ་སྒྲུང་གི་འཁྲུལ་གཞི་ལས་གྲོལ་པ་རེད་སྙམ། འདི་ ནི་ཁོ་བོས་མཁས་དབང་དུང་དཀར་བློ་བཟང་འཕྲིན་ལས་མཆོག་བསམ་གཞིག་གསར་པའི་ལོ་ རྒྱུས་ལྟ་ཚུལ་གྱི་སྲོལ་འབྱེད་པ་ཡིན་པར་བརྗོད་པའི་རྒྱུ་མཚན་གཙོ་བོ་དང་རིགས་ པའི་ཁུངས་སྐྱེལ་སའི་གཞི་འཛིན་ས་གཙོ་བོའང་ཡིན། །

ཟུར་བལྟའི་དཔྱད་གཞི།

1འབྲོང་བུ་ཚེ་རིང་རྡོ་རྗེ། དུང་དཀར་བློ་བཟང་འཕྲིན་ལས་ཀྱི་དཔྱད་རྩོམ་ལེགས་བཏུས། [G] ཀྲུང་གོའི་བོད་རིག་པ་དཔེ་སྐྲུན་ཁང་། 2014ལོ།

2ཀྲང་ཞོའུ་ཧྥན། ལོ་རྒྱུས་ཀྱི་གནད་དོན་དང་གནད་དོན་གྱི་ལོ་རྒྱུས། [G] རྒྱང་རིང་དཔེ་སྐྲུན་ཁང་། ༢༠༠༨ལོ།

3ལིའུ་ཞི།   མིའི་སེམས་ངོས་ཀྱི་ལོ་རྒྱུས། [M] སི་ཁྲོན་མི་རིགས་དཔེ་སྐྲུན་ཁང་། 1987ལོ།

4འབྲོང་བུ་ཚེ་རིང་རྡོ་རྗེ། དུང་དཀར་བློ་བཟང་འཕྲིན་ལས་ཀྱི་རིག་གཞུང་བསམ་བློའི་དཔྱད་རྩོམ་ཕྱོགས་བསྒྲིགས། [G]   ཀྲུང་གོའི་བོད་རིག་པ་དཔེ་སྐྲུན་ཁང་།

5ཀྲུའུ་ཀོན་ཆན་གྱི་རྩོམ་ཡིག་ཕྱོགས་བསྒྲིགས། [G]ཨན་ཧའེ་སློབ་གསོ་དཔེ་སྐྲུན་ཁང་། 1992ལོ།

6འབྲོང་བུ་ཚེ་རིང་རྡོ་རྗེ། རིག་གཞུང་སྨྲ་བའི་རྣམ་དཔྱོད། དངོས་སྟོབས་རིག་པའི་ཤེས་རབ། [N]བོད་ལྗོངས་ཉིན་རེའི་ཚགས་པར། 2014ལོའི་ཟླ3ཚེས་18ཉིན།

7ཐཱེན་ཧྲུན་ཁང་དང་ཅིན་ཀྲུང་ཡོན། དེང་རབས་ནུབ་ཕྱོགས་ལོ་རྒྱུས་རིག་པའི་གྲུབ་མཐའི་རྩོམ་བཏུས། [G]ཧྲང་ཧེའི་མི་དམངས་དཔེ་སྐྲུན་ཁང་། 1982ལོ།


 དེང་རབས་ཅན་དུ་བསྐྱོད་པའི་བསམ་གཞིག

 

3423343434

འབྲོང་བུ་ཚེ་རིང་རྡོ་རྗེས་བརྩམས།
དབང་དྲག་རྡོ་རྗེས་བསྒྱུར།

   འཛམ་བུ་གླིང་གི་རིག་གནས་གང་ཞིག་ཡིན་རུང་ཐམས་ཅད་ཕན་ཚུན་ཤོང་རྒྱ་ཡངས་པ་དང་། ཕན་ཚུན་འབྲེལ་འདྲིས་ཡོད་པ།   ཕན་ཚུན་ཤུགས་རྐྱེན་ཡོད་པ་ཞིག་ཡིན་ལ། མཐའ་མར་མི་རིགས་སོ་སོ་ཕྱོགས་ཡོངས་ནས་འཕེལ་རྒྱས་འགྲོ་བའི་སྒུལ་ཤུགས་ཤིག་ཏུ་འགྱུར་བ་མ་ཟད། དུས་ཡུན་རིང་མོའི་འབྲེལ་འདྲིས་ཁྲོད་སྣ་གཅིག་ཅན་དང་སྣ་མང་ཅན་གྱི་རིག་གནས་གསར་བའི་རྒྱུ་རིམ་གྱིས་གྲུབ་པ་ཞིག་ཡིན། དེ་ལྟ་བུའི་བརྒྱུད་རིམ་འདིའི་ནང་དུ།   དཔྱོད་པ་ལ་འཇུག་པའི་མི་རིགས་དག་རང་ཉིད་འཚོ་བའི་དུས་རབས་དེའི་ཤེས་རིག་གི་མདུན་གྲལ་དུ་ཚུད་པ་མ་ཟད། དེང་རབས་ཅན་གྱི་ཕྱོགས་སུ་བསྐྱོད་པའི་རྨང་གཞི་བསྐྲུན་ཡོད། ཡིན་ནའང་། མི་རིགས་ཁ་ཤས་ནི་ད་དུང་གནའ་བོའི་བསམ་གཞིག་གི་རྣམ་པའི་འོག་འཚོ་བ་བསྐྱལ་བཞིན་ཡོད། དེ་བས། དེང་ རབས་ཅན་ཞེས་པའི་ཡིག་འབྲུ་གསུམ་པོ་འདི་ཡར་རྒྱས་ལ་སྙེག་པའི་མི་རིགས་ཤིག་ལ་ མཚོན་ནས་བཤད་ན་ཆེས་རྒྱུས་ཡོད་པ་དང་། འཕེལ་རྒྱས་ཀྱི་ནུས་པ་མཚོན་པའི་དེང་རབས་ཅན་གྱི་མིང་བརྡ་ཞིག་ཡིན་ཀྱང་། གསོ་བྱེད་དབྱཱང་གིས་དབུལ་བའི་མཐོ་སྒང་དུ་འཚོ་ཞིང་གཞེས་པ། སྲོལ་རྒྱུན་རིག་གནས་ཀྱིས་བཟི་བར་བྱས་པའི་མཐོ་སྒང་པར་མཚོན་ན། དེངས་རབས་ཅན་ཞེས་པའི་ཡིག་འབྲུ་གསུམ་པོ་འདིའི་སྙིང་བོ་རྟོགས་རྒྱུ་དང་དེང་ རབས་ཤེས་རིག་གི་ལམ་དུ་བསྐྱོད་རྒྱུ་ནི་ཤིན་ཏུ་དཀའ་ཚེགས་ཆེ་བ་དང་། ཤིན་ཏུ་སྙིང་ན་བའི་གནས་ཤིག་རེད་ཅེས་ཀྱང་བཤད་ཆོག   ང་ཚོས་སྤྱི་ལོ་༡༩༥༡ལོའི་ཡར་སྔོན་གྱི་བོད་ཀྱི་དཔལ་འབྱོར་འཕེལ་རྒྱས་དང་དམངས་ཀྱི་འཚོ་བའི་གནས་ཚུལ་ལ་ཕྱིར་དྲན་དང་། འཕེལ་རྒྱས་ཀྱི་བསམ་གཞིག་གི་ངོས་ནས་གནད་དོན་འདི་ལ་འདང་རྒྱབ་ཚེ། མཐོ་སྒང་པ་ཅིའི་ཕྱིར་རྗེས་ལུས་དང་། རྙིང་ཞེན། ཅིའི་ཕྱིར་དུས་རབས་ཀྱི་འགྲོས་དང་བསྟུན་ཏེ་འཕེལ་རྒྱས་སུ་འགྲོ་མ་ཐུབ་པའི་རྒྱུ་མཚན་ལས་སླ་པོར་རྟོགས་ངེས། དེ་ཡང་ཡིན་ཏེ། གནད་དོན་དེ་དག་ཐམས་ཅད་སྲོལ་རྒྱུན་གྱི་བསམ་གཞིག་རྙིང་བ་ཁོ་ནར་བརྟེན་ནས་བྱུང་བ་ ཞིག་མ་ཡིན་པར་དུས་རབས་འདིར་འཚོ་ཞིང་གཞེས་པའི་ཤེས་ཡོན་ཅན་དག་གིས་དུས་རབས་ ཀྱི་འགན་མ་འཁུར་བར་ཡང་འབྲེལ་བ་ཆེན་པོ་ཡོད།

བོད་ཀྱི་ས་ཁམས་ཆགས་ཚུལ་དང་རིག་གནས་བསམ་སྤྱོད་ཁྱད་པར་ཅན་ཡིན་པའི་སྟེང་།   ཕྱི་ནས་འོངས་པའི་རིག་གནས་ལ་དད་ཞེན་ཤིན་ཏུ་ཆེ་བའི་ཁར།   མདོ་དབུས་མཐོ་སྒང་དུ་ས་སྐྱེས་རྡོ་སྐྱེས་སུ་གྱུར་བའི་བོན་གྱི་རིག་གནས་དེའང་སངས་ རྒྱས་ཆོས་ལུགས་ཀྱི་བསམ་བློས་ཚབ་བྱས་ཏེ་མིང་གི་ལྷག་མར་གྱུར་བ་ཞིག་རེད།   དུས་དེ་ནས་བཟུང་། མཐོ་སྒང་པས་སྤྱི་ཚོགས་འཕེལ་རྒྱས་ཀྱི་བརྒྱུད་རིམ་ཁྲོད་རང་ཉིད་ཀྱིས་གདམ་གསེས་དེ་ལ་དོགས་སློང་གཞར་ཡང་བྱས་མ་མྱོང་ཞིང་།   གདམ་གསེས་བྱས་པའི་སངས་རྒྱས་པའི་རིག་གནས་དེ་ནི་ཡ་ང་བའི་དངོས་ཡོད་ཀྱི་གནས་ཚུལ་ ཁྲོད་ནུས་མེད་ཉམས་ཆུང་ཡིན་པའི་གནས་ཚུལ་དེར་བསམ་གཞིག་གཞར་ཡང་བཏང་མ་མྱོང་། སྤྱི་ལོ་༡༩༨༨ལོར་དབྱིན་ཇི་བཙན་རྒྱལ་རིང་ལུགས་པའི་སྒྱོགས་མདེལ་དེས་གངས་རི་ར་བའི་ལྷིང་འཇགས་ཀྱི་སྒོ་མོ་བཙན་གྱིས་གཏོར་བའི་རྗེས་སུ། སངས་རྒྱས་ཆོས་ལུགས་ཀྱི་ཤེས་རབ་ལས་གཞན་པའི་སྟོབས་དང་ལྡན་པའི་དངོས་ཡོད་ཀྱི་ཤེས་རིག་ཅིག་ཡོད་པ་ཐོལ་གྱིས་རྟོགས་པ་དང་། དེ་འདྲའི་སྟོབས་ལྡན་གྱི་སྒྱོགས་རྫས་དང་སྲོལ་རྒྱུན་གྱི་རལ་གྲི་དང་འུར་རྡོ་ཕན་ཚུན་བསྡུར་བའི་ཚེ། སྲོལ་རྒྱུན་ཤེས་རིག་དང་ཚན་རྩལ་ཤེས་རིག་གསར་བའི་དབར་གྱི་ཧེ་བག་དེའང་གསལ་ལེར་རྟོགས་བྱུང་བ་རེད། རྒྱུ་མཚན་དེའི་དབང་གིས།   རྒྱལ་དབང་སྐུ་ཕྲེང་བཅུ་གསུམ་པའི་སྐབས་སུ། དབྱིན་ཇིར་ཕྱིན་ཏེ་ཚན་རྩལ་རིག་གནས་སློབ་སྦྱོང་དང་། སྲིད་སྐྱོང་ཐབས་ཇུས། སྤྱི་ཚོགས་ལམ་ལུགས་བསྒྱུར་བཅོས། བོད་གསར་བརྗེའི་ཏང་བཙུགས་པ་སོགས་བསམ་གཞིག་སྣ་ཚོགས་ཀྱི་ཚ་རླབས་ཤིག་དགུང་དུ་འཕྱུར་ནའང་། ཡིད་སྐྱོ་བ་ཞིག་ནི། རིག་གནས་རྒྱུན་སྲོལ་དང་སྤྱི་ཚོགས་ཧྲིལ་པོའི་བསམ་གཞིག་གི་མྱུ་གུ་གསར་དུ་འབུས་བཞིན་པའི་སྐབས་ཡིན་པས། བསྒྱུར་བཅོས་ཀྱི་བསམ་གཞིག་གང་ཡིན་ཀྱང་ཕམ་ཁའི་ངང་ནས་མཇུག་བསྒྲིལ་བ་ཞིག་རེད། མིའི་རིགས་ཀྱིས་རང་ཉིད་ཀྱི་ལས་དབང་ལ་བཅོས་བསྒྱུར་དང་། ཤེས་རིག་དང་ལྡན་པའི་ལོ་རྒྱུས་གསར་དུ་བཏོད་པའི་བརྒྱུད་རིམ་ཁྲོད་ཕམ་ཉེས་འབྱུང་མི་ཆོག་པ་ཞིག་ག་ལ་ཡིན་ཀྱང་། མདོ་དབུས་མཐོ་སྒང་གི་ཕྱི་རབས་པས་ནམ་ཡང་རང་ཉིད་ཕམ་ཉེས་བྱུང་བའི་རྒྱུ་རྐྱེན་ལ་བསམ་གཞིག་མི་གཏོང་བའི་རྒྱུ་མཚན་ཅི་ཡིན་ནམ། དུས་ རབས་ཉི་ཤུ་པའི་དུས་འགོར་དགེ་འདུན་ཆོས་འཕེལ་གྱིས་བསྒྱུར་བཅོས་བསམ་གཞིག་བཏང་ པའི་ཕྱི་ཡི་ཚུལ་དང་ནང་གི་བདེན་པར་ང་ཚོས་ནམ་ཡང་བསམ་ཞིབ་བྱས་མ་མྱོང་ལ། བསྒྱུར་ བཅོས་བྱེད་པའི་བསམ་བློའི་མཛུབ་སྟོན་དང་དམིགས་ཡུལ་ཅི་ཞིག་ཡིན་པར་ཞིབ་འཇུག་ དང་དཔྱོད་གླེང་བྱེད་མཁན་བོད་པ་ཤེས་ལྡན་དེ་བས་བྱུང་མྱོང་མེད། འདི་ནི་དེ་སྔའི་བསྒྱུར་བཅོས་བསམ་གཞིག་ལ་ལོ་རྒྱུས་ཀྱིས་བདེན་དཔང་འབྱུང་མ་ཐུབ་པའི་རྒྱུ་རྐྱེན་ཞིག་དང་།   འབྱུང་འགྱུར་གྱི་བསྒྱུར་བཅོས་བསམ་གཞིག་གང་ནས་འགོ་བརྩམས་དགོས་པའི་འགག་རྩའི་གནད་དོན་ཞིག་ཡིན་ལ། ད་ལྟའི་ཤེས་ལྡན་སྐྱེ་བོ་རྣམས་ཀྱིས་བསམ་གཞིག་གཏོང་དགོས་པ་དང་མདུན་དུ་བསྣར་བའི་དངོས་ཡོད་ཞིབ་འཇུག་གི་ལས་གཞི་ཆེན་པོ་ཞིག་ཀྱང་རེད།

ཀུན་གྱིས་མཁྱེན་གསལ་ལྟར། བཙན་པོ་དར་མ་འཇོན་ནུས་མ་ལྡན་པའི་སྟབས་ཀྱིས་བཙན་པོའི་རྒྱལ་རབས་འཐོར་ཞིག་ཏུ་སོང་སྟེ། མདོ་དབུས་མཐོ་སྒང་གི་ཆབ་སྲིད་མི་བརྟན་སིལ་བུར་གྱུར་བ་དང་། སྤྱི་ཚོགས་ཀྱི་སྒྲིག་གཞི་རྙོག་འཛིང་ཆེ་བ།   རིག་གནས་དང་དད་མོས་ཉམས་ཉེས་སུ་འགྱུར་བའི་དུས་རབས་ཤིག་ཏུ་སླེབས་པ་རེད།   སིལ་བུར་འཐོར་བའི་རྗེས་ཀྱི་འཕེལ་འགྱུར་གྱི་ཁ་ཕྱོགས་ཇི་ལྟར་གདམ་གསེས་བྱེད་རྒྱུ་དང་། ཤེས་ རྟོགས་དང་རིག་གནས་བསམ་གཞིག་ཡོད་ཚད་ཇི་ལྟར་གསར་འཛུགས་བྱེད་རྒྱུ་དེ་ནི་དུས་ སྐབས་དེའི་མཐོ་སྒང་པའི་མདུན་དུ་ལྷགས་པའི་དངོས་ཡོད་ཀྱི་གནད་དོན་ཆེན་པོ་ཞིག་རེད། སྐབས་དེར། སྤྱི་ཚོགས་འཐོར་ཞིག་སོང་བ་དང་མི་རྣམས་ཟང་ཟིང་དུ་གྱུར་ཡོད་པས། མཐོ་སྒང་གི་ཤེས་ཡོན་ཅན་རྣམས་ལ་མ་འོངས་པའི་འཕེལ་རྒྱས་ཀྱི་ཁ་ཕྱོགས་ལ་མནོ་བསམ་གཏོང་བའི་གོ་སྐབས་མང་པོ་ཞིག་འབྱུང་ཐབས་མེད། རྒྱུ་མཚན་ནི། མིའི་ རིགས་ཀྱི་འཚོ་གནས་དང་གོ་ལ་རིལ་པོའི་འཕེལ་རྒྱས་ཀྱི་ཆོས་ཉིད་ལྟར་ན་བློ་སྒོ་ ཡངས་པོར་ཕྱེ་བའི་རྗེས་སུ་བསྐྱར་དུ་གདམ་གསེས་བྱེད་དགོས་ན་ངེས་པར་དུ་བསམ་ གཞིག་མཁྲེགས་འཛིན་གྱི་ཕྱོགས་སུ་འགྲོ་བ་དང་། སེམས་ཁམས་བཀག་སྡོམ་གྱི་ལམ་དུ་འགྲོ་སྲིད། དེ་ལྟ་བུའི་བསམ་གཞིག་རྙིང་བ་དང་མཁྲེགས་འཛིན་ཅན་གྱིས་ཅི་ཞིག་གསལ་བཤད་བྱེད་ཀྱི་ཡོད་དམ། གལ་ཏེ་ཁྱེད་རང་དེང་རབས་ཀྱི་མི་ཞིག་ཡིན་པ་དང་། དངོས་ཡོད་སྤྱི་ཚོགས་ནང་འཚོ་བ་རོལ་བཞིན་པའི་ཤེས་ལྡན་པ་ཞིག་གི་ངོས་ནས་བསམ་ཞིབ་བྱས་ཚེ། སྲོལ་རྒྱུན་གྱི་བསམ་པའི་དཔལ་ཡོན་དེ་དེང་རབས་ཅན་གྱི་ཤེས་རིག་དང་ལྷན་དུ་གནས་དུས།   ཇི་འདྲའི་ཉམས་ཆུང་ཞིང་བག་འཁུམས་པ། དེང་རབས་ཤེས་རིག་གིས་རྡོག་བརྫིས་དང་རྩིས་མེད་གཏོང་བའི་རྒྱུ་མཚན་མཐའ་དག་གསལ་བོར་ཤེས་རྟོགས་ཐུབ་ངེས། གཅིག་བྱས་ན་འདི་ནི་ང་ཚོ་དེང་རབས་ཀྱི་མིས་སྲོལ་རྒྱུན་རིག་གནས་ཀྱི་ཕྱི་ཡི་ཚུལ་དང་ ནང་གི་བདེན་པར་བསམ་ཞིབ་བྱེད་སྐབས་འཛེམ་དོགས་མེད་པར་དང་ལེན་བྱེད་དགོས་པའི་ལོ་རྒྱུས་ཀྱི་གནད་དོན་ཞིག་ཡིན་པ་དང་། ང་ཚོ་དེང་རབས་ཀྱི་མིའི་ཀླད་པའི་ནང་རྙིང་ཞེན་གྱི་ཚོར་བ་དང་བློ་ཕམ་ཡིད་ཆད་འབྱུང་བའི་རྒྱུ་རྐྱེན་གཙོ་བོའང་ཡིན་རྒྱུ་རེད།

དཔལ་འབྱོར་འཛམ་གླིང་རང་བཞིན་ཅན་དུ་གྱུར་བའི་ད་ལྟའི་དུས་འདིར། མདོ་དབུས་མཐོ་སྒང་པས་དེང་རབས་ཅན་གྱི་ཆོ་འཕྲུལ་འདི་ཁས་ལེན་མི་བྱེད་ཐབས་མེད་དུ་གྱུར་ཡོད། སྤྱིར་དེང་རབས་ཅན་གྱིས་རྒྱུས་མེད་ཀྱི་དངོས་པོ་གསར་བ་གང་ཞིག་བསྐྲུན་པ་དང་། ང་ཚོ་ལ་འཇིག་ཉེན་ཅི་ཞིག་བསྐྱལ་འོང་ནའང་།   དེང་རབས་ཅན་དང་ལེན་མི་བྱེད་པ་ནི་མིའི་རིགས་ཀྱི་འཇིག་རྟེན་དང་ཁ་བྲལ་བསམ་པ་དང་། མིའི་རིགས་ཉེ་བར་འཚོ་བའི་གོ་ལ་ཟླུམ་པོ་དང་ཁ་བྲལ་འདོད་པ་དེ་རེད། དེང་རབས་ཅན་དང་ལེན་མི་བྱེད་པ་ནི་དབུལ་པོ་དང་རྗེས་ལུས།   བླུན་རྨོངས་ཀྱི་འཚོ་བ་ཞིག་དང་ལེན་བྱས་པ་དང་ཆ་མཚུངས་ཤིང་། མིའི་རིགས་ཀྱི་སྤྱི་ཚོགས་དང་ཁ་བྲལ་བའམ་དེ་ལ་འཚོ་སྡོད་བྱེད་པའི་དུས་རབས་དང་ཁ་བྲལ་བ་ཞིག་རེད། དེང་རབས་ཅན་དང་ལེན་མི་བྱེད་པའི་བྱེད་ཐབས་ལ་བརྟེན་ན་མིའི་རིགས་ཀྱིས་རང་ཉིད་ཀྱི་སྲོལ་རྒྱུན་རིག་གནས་རྒྱུན་འཛིན་བྱེད་ཐབས་བྲལ་བས། དེང་རབས་ཅན་དང་ལེན་མི་བྱེད་པའི་མཇུག་འབྲས་ཇི་ལྟ་བུ་ཞིག་ཡིན་པ་བློས་དཔོག་ཐུབ་པ་སྟེ། མཐོ་སྒང་གི་སྲོལ་རྒྱུན་རིག་གནས་ཉིད་ཉམས་རྒུད་དང་རྩ་མེད་དུ་འགྲོ་བའི་ལམ་ཁ་ཞིག་ཏུ་བསྐྱལ་བཞིན་པ་དེའོ། །དེའི་རྒྱུ་མཚན་གྱིས། ང་ཚོས་དེང་རབས་ཅན་དང་སྲོལ་རྒྱུན་རིག་གནས་གཉིས་འགལ་བ་ལྟག་སྤྲོད་དུ་མི་བསམ་པ་དང་། དེང་རབས་ཅན་དུ་སྙེག་པའི་མཐར་ཐུག་གི་དམིགས་པ་ནི།   མཐོ་སྒང་གི་ ཕུལ་དུ་བྱུང་བའི་སྲོལ་རྒྱུན་རིག་གནས་འདི་ཉིད་སྲུང་སྐྱོབ་དང་། དར་སྤེལ། རྒྱུན་འཛིན། བདག་གཅེས་བྱེད་པའི་ཕྱིར་དུ་ཡིན་པས། ཁྱེད་ཀྱིས་དེ་འདྲ་བསམ་གྱི་མེད་དམ།

གལ་ཏེ་དེང་རབས་ཅན་མེད་ན། ཐོན་སྐྱེད་ནུས་ཤུགས་ཀྱི་སྒོ་འབྱེད་མི་ཐུབ་པས། མི་རྣམས་ཀྱིས་སྲོལ་རྒྱུན་རིག་གནས་སྲུང་སྐྱོབ་བྱེད་འདོད་ཀྱང་སྲུང་སྐྱོབ་བྱེད་ནུས་སམ།   ཤེས་ རིག་ལྡན་ཞིང་སྤྲོ་སྐྱིད་ལྡན་པའི་ཡིད་འོང་གི་མཐོ་སྒང་ཞིག་གསར་དུ་བསྐྲུན་ འདོད་ཀྱང་བསྐྲུན་ནུས་སམ། འབྱུང་བར་འགྱུར་བའི་འཕེལ་རྒྱས་ཀྱི་འཆར་འགོད་ཅིག་བཟོ་འདོད་ཀྱང་བཟོ་ནུས་སམ། གལ་ཏེ་དེ་ལྟར་མི་ནུས་ན། ང་ཚོས་བསམ་གཞིག་ཡོད་ཚད་ཀྱི་ཤེས་རྟོགས་དང་རིན་ཐང་གི་གནད་དོན་ལ་བསྐྱར་དུ་དཔྱད་འཇོག་བྱེད་དགོས་པ་དང་། ང་ཚོའི་བསམ་གཞིག་གི་ཤེས་རྟོགས་དང་མིའི་རིགས་ཀྱི་སྤྱི་ཚོགས་འཕེལ་བའི་ཆོས་ཉིད་ཟུང་འབྲེལ་གྱིས་དེང་རབས་ཅན་དང་ལེན་བྱས་ཏེ། དངོས་ཡོད་དང་འཚམ་པའི་མི་ཞིག་བྱེད་དགོས། སྤྱི་ཚོགས་འཚོ་བའི་ཁྲོད་དུ་སྣང་བས་མུན་པའི་ཚབ་བྱེད་པ་དང་། ཤེས་རབ་ཀྱིས་གཏི་མུག་གི་ཚབ་བྱེད་པ། བློ་སྒོ་ཡངས་པོས་བཀག་སྡོམ་གྱི་ཚབ་བྱེད་པ། དེང་རབས་ཅན་གྱིས་རྗེས་ལུས་དང་དབུལ་བོའི་ཚབ་བྱེད་ཀྱི་ཡོད་པས། འདི་ནི་མདོ་དབུས་མཐོ་སྒང་འཕེལ་རྒྱས་སུ་འགྲོ་བའི་གདམ་གསེས་ཉག་གཅིག་ཡིན་ལ། མདོ་དབུས་མཐོ་སྒང་ཉིད་ཡར་རྒྱས་གོང་འཕེལ་གྱི་ལམ་ཁ་ཞིག་ཏུ་བསྐྱོད་པའི་ཐབས་ལམ་ཉག་གཅིག་ཀྱང་ཡིན།

(ངེད་དྲ་བར་བཀོད་པའི་རྩོམ་ཡིག་དག་གཞུང་སྒེར་གྱི་དྲ་བ་དང་འཕྲིན་སྟེགས་གཉེར་མཁན་ཚོས་ཆོག་མཆན་མེད་པར་གང་འདོད་དུ་འཁྱེར་མི་ཆོག)

qrcode_for_gh_24a680a08df5_430

One thought on “དུང་དཀར་བློ་བཟང་འཕྲིན་ལས་ཀྱི་བསམ་གཞིག་གསར་བའི་ལོ་རྒྱུས་ལྟ་ཚུལ་དཔྱོད་གླེང་།

  1. གླང་དར་མའི་སྲས།

    དྲང་མོར་བཤད་ན་རྩོམ་པ་པོས་དོན་དམ་པར་ཅི་ཞིག་བརྗོད་འདོད་པ་དེ་གསལ་བོར་མ་རྟོགས། ཕལ་ཆེར་བསྒྱུར་བའི་སྐྱོན་ཡིན་རྒྱུ་རེད། ཧ་ཧ།

དཔྱད་མཆན་སྤེལ།

ཡིག་ཟམ་ས་གནས་ཀུན་པོར་མི་བསྒྲགས། རྟགས * ཅན་ངེས་པར་དུ་བླུགས་དགོས།